78-anyos na dating tsuper, inatake sa puso habang nakikiisa sa transport strike

Isinugod sa ospital ang isang 78-anyos na dating tsuper matapos atakihin sa puso sa gitna ng kaniyang pakikiisa sa transport strike ng grupong PISTON nitong Martes. Ang biktima, kabilang sa mga tsuper na ikinulong noong COVID-19 pandemic dahil sa pagwelga sa gitna ng lockdown.

Sa ulat ni Gabriel Gonzales sa GTV News Balitanghali nitong Miyerkoles, sinabing nahihirapan ngayong huminga at kritikal ang kondisyon ng dating tsuper na si Elmer Cordero, matapos atakihin sa puso sa unang araw ng protesta ng grupong PISTON sa Monumento.

Bago nito, makikita sa isang larawang pinost ng grupong PISTON na malakas pa si Cordero habang nakikiisa sa welga bago siya atakihin.

“Bigla na lang daw pong sumikip 'yung dibdib at nawalan na po siya ng malay. Hindi po siya nagsabi na masama 'yung pakiramdam niya, basta umupo na lang daw po siya,” sabi ni Janette Gabatin, Secretary General ng PISTON - NCR.

Dahil na rin sa kaniyang edad, maaari umanong pinalala ng ibang sakit ang kondisyon ni Cordero, na limang dekadang naging jeepney driver.

“Ang una niya pong iniinda ay 'yung sakit niya po sa likod. At napag-alaman ko rin po na may asthma siya. Ang sabi po ng nakausap kong nurse, parang komplikasyon na po ‘yun sa puso at saka 'yung sa asma niya,” sabi ni Gabatin.

Kasama si Cordero sa tinaguriang “Piston 6” o anim na miyembro ng grupo na dinakip at ikinulong noong 2020 matapos silang magkilos-protesta, na labag sa quarantine protocol, ayon sa pamahalaan.

Inatras naman kalaunan ang reklamo laban sa Piston 6.

Sinabi ng grupong PISTON na nagsisilbing inspirasyon si Tatay Elmer sa lahat ng mga kasapi dahil sa sigasig niya sa pagsusulong ng karapatan ng mga tsuper.

“Masipag po si Tatay Elmer rin. Nangunguna po sa lahat iyon. Ayaw po niya ng nali-late siya. Humuhugot po siya sa pinaglalaban niya. Basta isa lang po 'yung sinasabi niya. Kailangan manalo ang pinaglalaban ng mga kita ng tsuper,” sabi ni Gabitin.

Kasalukuyang naka-confine si Tatay Elmer sa Caloocan City Medical Center.

Humihingi ng tulong ang kaniyang pamilya para sa mga gastusin sa ospital. – Jamil Santos/FRJ GMA News