September inflation rate, sumirit sa 7.2%; pinakamabilis mula March 2023

Sumirit sa 7.2% ang inflation rate o bilis ng pagtaas ng presyo ng mga bilihin at serbisyo sa Pilipinas nitong nakaraang Setyembre 2026. Dahil dito, naputol ang apat na magkakasunod na buwan nang pagbaba nito, ayon sa Philippine Statistics Authority (PSA) nitong Martes.

Sa press briefing, iniulat ni National Statistician at PSA chief Claire Dennis Mapa na mas mataas ng 1.1% ang inflation rate noong nakaraang buwan kumpara sa 6.1% na naitala nitong Agosto.

Ang inflation rate nitong Setyembre ay katulad noong Abril 2026, at pinakamabilis na pagtaas mula noong Marso 2023 na umabot sa 7.6%.

Dahil dito, umakyat sa 5.4% ang average inflation rate mula Enero hanggang Setyembre 2026, na mas mataas sa comfortable ceiling na target ng gobyerno na 2% hanggang 4%.

“Ang pangunahing dahilan ng mas mataas na antas ng inflation para sa buwan ng Setyembre 2026 kumpara noong buwan ng Agosto 2026 ay ang mas mabilis na pagtaas ng presyo ng Food and Non-Alcoholic Beverages na may 6.7% inflation rate,” ani Mapa.

Noong Agosto 2026, nasa 4.6% ang inflation rate ng food and non-alcoholic beverages.

Malaki rin ang naging ambag ng index na ito sa kabuuang pagtaas ng inflation noong Setyembre, na umabot sa 73.4%.

Pangalawang may pinakamalaking ambag sa pagtaas ng inflation ang housing, water, electricity, gas at iba pang fuels, na umakyat sa 8.4% mula 7.9%. Mayroon itong 9.9% na ambag sa kabuuang pagtaas ng inflation.

Tumaas din ang inflation sa transport sector sa 14.6% mula 13.5% noong nakaraang buwan.

Ang food inflation, na sumusukat sa pagbabago ng presyo ng mga pagkaing karaniwang binibili ng mga pamilya, ay umakyat sa 6.8% noong Setyembre mula sa 4.6% noong Agosto.

Ayon sa PSA, dulot ito ng 10.7% annual growth sa presyo ng mga gulay, root crops, saging at legumes noong Setyembre, kumpara sa 3.4% annual decrease noong Agosto 2026.

Sa isang pahayag, sinabi ni Department of Economy, Planning, and Development (DEPDev) Secretary Arsenio Balisacan, na pangunahing nagtulak sa pagtaas ng inflation nitong Setyembre ang pagkaantala sa suplay ng pagkain dahil sa masamang panahon at pagtaas ng presyo ng langis sa pandaigdigang merkado.

“These are significant supply-side pressures, but they are being met with targeted interventions to mitigate the impact on households,” ani Balisacan. – FRJ GMA News