Justin Brownlee, may problema sa puso kaya 'di nakapaglaro sa Asian Games, PBA, ayon kay Cone

Inihayag ni Gilas Pilipinas at Barangay Ginebra head coach Tim Cone na may iniindang problema sa kalusugan si Justin Brownlee na naging dahilan para hindi siya makapaglaro sa Asian Games at sa kasalukuyang PBA Governors’ Cup.

Sinabi ito ni Cone sa pagdinig ng Senate Committee on Sports nitong Huwebes para sa post-evaluation sa naging paglahok ng delegasyon ng Pilipinas sa Asian Games.

“He's had some… it's not injury concerns, he's had health concerns. That's why he's not playing for Ginebra at this time. Why he hasn't played this conference is because he's had health concerns regarding blood pressure, heart issues. So he is not able to play at this point,” paliwanag ni Cone.

Tungkol naman sa iba pang naturalized players na hindi nakapaglaro sa Asiad, sinabi ni Cone na may kontrata si Ange Kouame sa France at hindi siya pinayagang umalis. Samantalang hindi naman natapos sa oras ang naturalization papers ni Benny Boatwright para maisama siya sa pagsusumite ng long list.

Sinabi naman ni Samahang Basketbol ng Pilipinas executive director Erika Dy na nakipag-ugnayan na ang basketball federation sa Philippine Embassy sa China, kung saan kasalukuyang naglalaro si Boatwright.

Nabigo ang Pilipinas na maipagtanggol ang gold medal nito sa Asian Games at nagtapos sa ika-siyam na puwesto sa torneo. —Justin Kenneth Carandang/FRJ GMA News