1 babae at 1 lalaki ang 2 Pilipino na nasawi sa bus accident sa Germany na nakabase sa Milan, Italy

Nakabase sa Milan, Italy ang dalawang turistang Pilipino na nasawi nang maaksidente ang bus na kanilang sinasakyan sa Bavaria na malapit sa Munich, Germany nitong Linggo. Ang isa sa kanila, overseas Filipino worker (OFW) na lalaki, at kasama ang misis niya sa mga sugatan.

Sa ulat ni Mariz Umali sa GMA News 24 Oras nitong Lunes, sinabi ng mga awtoridad na galing sa Milan ang bus na sakay ang mahigit 30 Pilipino, at patungo sa isang beer festival sa Munich.

Ayon kay Department of Migrant Workers (DMW) Secretary Hans Leo Cacdac, batay sa paunang impormasyon, hindi mga Pilipino ang dalawang driver ng bus.

Iniimbestigahan pa ang dahilan ng sakuna, na nagresulta rin ng pagkakasugatan ng 22 pang sakay ng bus na pawang mga Pinoy din.

Sa bilang ng mga sugatan, 19 pa ang nananatili sa ospital.

Isa sa mga nasawi ay nakilalang si Cornelio Rivera Camus Jr., 58-anyos, isang OFW sa Milan. Sugatan naman at nasa ospital pa rin ang kaniyang asawa na si Vangie.

Nakausap ng GMA News ang kanilang anak pero tumanggi muna siyang magbigay ng pahayag sa gitna ng kanilang pinagdadaanan.

Gayunpaman, nakikiusap sila ng tulong pinansiyal dahil sa dami ng kinakaharap nilang problema.

Samantala, isang 27-anyos na Pinay na nakabase rin sa Milan ang isa pang nasawi, batay sa impormasyon na galing sa German police.

Ayon kay Cacdac, nakikipag-ugnayan ang kanilang grupo sa Consul General ng Pilipinas doon upang tulungan ang mga biktima.

Tiniyak ng kalihim na aasikasuhin ang repatriation sa mga labi ng dalawang nasawi, at susubaybayan sa kalagayan at pangangailangan ng mga nasa ospital pa.

Sinabi rin ni Cacdac na tutulungan din ang mga Pinoy na nakaligtas na kailangan ng matutuluyan bago sila bumalik sa Milan.

“Hindi sila gagastos ng kahit isang kusing sa paglagi nila doon until sa pagbalik nila sa Milan,” ayon kay Cacdac. – FRJ GMA News