5 alagang aso, hinihinalang nilason sa La Union; 5 aso at 14 na manok naman ang nalason sa Ilocos Norte

Nasawi ang limang alagang aso matapos lasunin umano ng hindi pa matukoy na salarin sa Bacnotan, La Union. Sa Ilocos Norte, tatlong aso at 14 na manok naman ang namatay dahil sa lason na inilagay para sana sa mga daga.

Batay sa impormasyon ng GMA Regional TV, na iniulat sa Balitanghali nitong Huwebes, sinabing naniniwala ang may-ari ng tatlo sa mga aso na may naglason sa kaniyang mga alaga.

Pag-aari naman ng kaniyang kapitbahay ang dalawa pang aso na namatay.

Matapos ang insidente, isang beterinaryo ang nagtungo sa lugar at kinuha ang isang aso para matukoy ang dahilan ng pagkamatay.

Kinondena ng Animal Kingdom Foundation ang pagkamatay ng mga alagang aso, at nanawagan sa kung sino man na nakakita sa nangyari na mag-report sa mga kinauukulan.

Samantala sa Bacarra, Ilocos Norte, nasawi rin ang tatlong aso at labing apat na manok matapos makakain ng lason.

Sinabi ng may-ari na nakakain ang kaniyang mga alaga ng lason na para sana sa daga na nakalagay sa bukid malapit sa kanilang bakuran.

Inilagay umano ang lason ng isang barangay kagawad dahil pinepeste ng mga daga ang ilang pananim.

Sinabi ng may-ari sa mga hayop na hindi sila nasabihan tungkol dito.

Nagkaayos naman kalaunan ang magkabilang panig. – Jamil Santos/FRJ GMA News