Bribery case vs Sara Duterte sa impeachment trial, 'di na itutuloy ng House prosecution team

Nagpahayag sa Senate impeachment court ang prosecution panel ng Kamara de Representantes na aalisin na nito sa ginagawang paglilitis kay Vice President Sara Duterte ang Article III na may kaugnayan sa alegasyon ng panunuhol laban sa huli.

Sa isang press conference nitong Biyernes, sinabi ni House prosecutor Keith Flores, na nakapagdesisyon na ang prosecution team at ipinaalam na ito sa Senado.

"I think we already filed our manifestation last Tuesday pa that we will be dropping bribery… the team already came to a decision (that) we will end with Article II," saad ni Flores.

"It's totally at the discretion of the prosecution team po kung anong articles ang ipo-prosecute nila and in this particular case, we did all three articles except for Article III, which is bribery," dagdag niya.

Tinutukoy sa Article III ang paratang na dapat ma-impeach si Duterte dahil sa umano’y panunuhol sa pamamagitan ng pagbibigay ng pera o mga bayad sa mga opisyal ng Department of Education (DepEd) upang hikayatin silang labagin o iwasan ang pagsunod sa mga batas sa procurement at iba pang kaugnay na batas.

Ayon kay Flores, hindi gaanong nakabatay sa tibay ng kanilang kaso ang desisyong alisin ang naturang artikulo. Sinabi niyang isinasaalang-alang lamang ng prosecution team ang itinakda nilang timetable.

Gayunman, ang tinutukoy na takdang panahon ni Flores ay hindi ang timeline na itinakda ng prosecution team noong pre-trial.

"We think we have already presented enough on all the three articles and to drag it further pa na i-include na pa namin yung bribery, might be stretching the patience not only of the people, but also of the senator-judges," paliwanag ni Flores.

Naiprisinta na ng prosecution team ng Kamara ang tatlo sa apat na artikulo ng impeachment na unang inihain laban kay Duterte.

Una rito ang Article IV, na tumutukoy sa umano’y pagbabanta laban kina Pangulong Ferdinand “Bongbong” Marcos Jr., First Lady Liza Araneta-Marcos, at dating House Speaker Martin Romualdez. Sinundan ito ng Article I, na may kaugnayan sa umano’y maling paggamit ng confidential funds.

Kasalukuyang tinatalakay sa impeachment court ang Article II o ang paratang na may hindi maipaliwanag na yaman si Duterte.

Iginiit naman ni House prosecutor at 1-Rider party-list Representative Rodge Gutierrez, na nananatiling matibay ang kanilang kaso.

"All articles that were filed in the impeachment… would stand on their own," ani Gutierrez. — FRJ GMA News