Pakiusap ni Camille Villar sa mga kapuwa senador: 'Can we stop it? With these attacks on each other?'

Naging emosyonal si Senator-judge Camille Villar nitong Miyerkules habang nananawagan sa kaniyang mga kapuwa senador na igalang ang mga kasamahang hindi nakadadalo sa impeachment trial ni Vice President Sara Duterte dahil sa mga kinakaharap na usaping legal at pangkalusugan.

Tumayo ang pinakabatang senador na si Villar sa ika-29 na araw ng impeachment trial matapos na muling igiit ni Senator-judge Erwin Tulfo, na pag-usapan ng Senate impeachment court ang naging desisyon nito kaugnay ng pagliban ng ilang kasamahan, na maaaring makaapekto sa botohan kapag hinatulan na si Duterte.

“The present realities that some of our members are beyond the coercive power or jurisdiction of the Senate, one is on a medical leave abroad, with no definite return date,” ani Tulfo.

“Another is in hiding. Two others are under the custody of the Sandiganbayan or the Bureau of Jail Management and Penology. Ito po ang factual circumstances na umiiral ngayon. At hindi naman po ito umiiral o umiral nung tayo po ay nagsisimula pa lamang sa ating proceedings,” dagdag niya.

Tinutukoy ni Tulfo sina Senator-judge Loren Legarda, na kasalukuyang naka-extended medical leave; Senator-judges Jinggoy Estrada at Rodante Marcoleta, na nakadetine kaugnay ng mga kasong plunder; at Senator-Judge Ronald dela Rosa, na nagtatago dahil sa umano’y arrest warrant na inilabas ng International Criminal Court.

Ayon kay Tulfo, nakasaad sa 1987 Constitution ang two-thirds supermajority requirement bilang proteksiyon laban sa posibleng pag-abuso sa kapangyarihang mag-impeach. Aniya, hindi nila inasahan na maaaring maharap mismo sa mga kasong kriminal at plunder ang mga senador.

“Because it is a fraction, the mathematical baseline dynamically moves or varies depending on structural, operational, situational factors affecting the Senate composition,” ani Tulfo.

“Ang mga kaso po ng mga senador noon, either subversion, sedition, yun po ang mga kaso. Pero ang mga senador po ay hindi po nakakasuhan ng kriminal, plunder, at kung ano-ano pa,” dagdag niya.

Kasunod nito ay tumayo si Villar upang sabihin na hindi dapat batikusin ang mga absent na senador sa impeachment trial dahil sa mga kasong kinakaharap ng mga ito.

“While I respect all of my colleagues here, all of you, I think we should be reminded that all of the senators that are detained and who are not here right now, that is not their choice,” saad ni Villar.

Sinabi ni Villar na hindi dapat tawaging mga kriminal ang mga absent na senador dahil hindi pa naman naghahatulan ang mga ito sa kinakaharap nilang mga kaso.

“And I think it is unfair to call them out that their crimes are plunder and theft because none of those senators have been convicted. There are even a lot of questions why they are not here in the first place,” pahayag niya.

“As the youngest member of this august body, can we stop it? With these attacks on each other?” pakiusap niya.

Sa pagsisimula ng impeachment trial, binigyang-diin ni Senate impeachment court presiding officer Francis Escudero na nakasaad sa 1987 Constitution na walang sinuman ang maaaring mahatulan nang walang pagsang-ayon ng two-thirds ng lahat [24] na miyembro ng Senado, o 16 na boto.

Nitong Miyerkoles, namayani sa botohan na ibaba ang bilang ng mga boto na kailangan, at hindi na isasama ang mga senador na hindi nakadadalo sa impeachment hearing.

Kung dati ay 16 ang kailangan na boto para ma-convict si Duterte at siyam na boto ang kailangan para mawalang-sala siya sa bilang ng 24 na senador, mababawasan na ito, kapag 20 senador lang ang isinali sa botohan.– FRJ GMA News