ALAMIN: Pangalan ng lungsod ng 'Marikina,' saan nga ba kinuha?

Madalas na malubog sa baha ang Marikina na kilala rin bilang “Shoe Capital of the Philippines,” dahil sa tila palanggana o catch basin ng tubig ang posisyon nito. Ang pangalan ng lungsod, sinasabing hango sa isang alamat na ang kuwento ay may kaugnayan din sa trahediya at tubig. Alamin.

Sa dokumentaryo ni Howie Severino para sa I-Witness na “Si Marikit at ang Baha,” ipinaliwanag ni Professor Tyrone Nepomuceno, historian sa University of Santo Tomas, na nanggaling umano sa oral history ang pangalan ng Marikina—si “Marikit.”

Ayon sa kuwento, si Marikit may isang napakagandang babae na naninirahan malapit sa ilog at gandang-ganda sa kaniyang sarili.

Palagi niyang pinagmamasdan ang kaniyang sarili sa salamin, at hindi lumalabas ng bahay kapag hindi siya nakaayos.

“At sinasabi ng mga tao, ‘Alam mo Marikit, Marikit ka na, maganda ka na.’ Lagi pong sinasabi sa kaniya iyon. Pero hindi po siya nasa-satisfy sa ganu’n,” paliwanag ni Nepomuceno.

Hanggang sa isang araw, niyaya si Marikit ng kaniyang pinsan na magsimba. Pagsakay sa bangka, tumigil si Marikit at nanalamin sa ilog.

Sa pananalamin ni Marikit sa tubig, hindi pa rin siya makuntento sa sarili niya.

“Biglang dumilim, umulan nang malakas. Lumaki bigla ang tubig sa ilog, may mga kasamang putik, at ‘yun, inanod na daw siya,” pagsasalaysay ng historian.

Kung kaya nabuo ang “Marikina” mula sa “Marikit na.”

“Nakita naman daw po ‘yung bangkay ni Marikit, pero ang sabi ng mga tao, ‘Aba, bangkay na ito, pero Marikit pa rin siya.’ Maganda pa rin siya kahit wala na. So, doon po, nagsimula ‘yung pangalan ng aming bayan na ngayon ay siyudad na ‘Marikina.’ ‘Marikit na.’ ‘Marikit ka na’ – Marikina,” sabi ni Nepomuceno.

Sa kasalukuyan, may nakatayong estatuwa ni Marikit sa gilid ng ilog ng Marikina.

Ayon kay Engr. Felix Romero Maderal, former chief ng Marikina River Parks Authority, na bukod sa “aesthetic,” sumisimbolo rin si Marikit ng kanilang alamat.

Ang estatwa rin ni Marikit ang nagsisilbi ring sukatan para maging alerto ang mga residente pagdating sa mga baha. Kung halimbawang umabot na ang tubig ng ilog sa kuko ng mga paa o sa palda, nangangahulugan na kailangan nang maghanda ang mga tao dahil indikasyon ito ng matinding pagbaha.

Nang manalasa noon ang bagyong Ondoy, isa ang Marikina sa mga lugar na matinding napuruhan ng pagbaha. Maraming bahay ang nalubog sa tubig at marami ang nasawi.– FRJ GMA News