Mag-ina, patay sa sunog sa Caloocan; padre de pamilya at 1 pang anak, sugatan

Nasawi ang isang ina at kaniyang anak, habang sugatan naman ang kanilang padre de pamilya at isa pa nilang anak matapos masunog ang kanilang bahay sa Caloocan City nitong madaling-araw ng Lunes.

Sa ulat ni James Agustin sa GMA News 24 Oras, sinabing naganap ang sunog sa Velasco Street sa Barangay 7 dakong 4:00 a.m. Makikitang tumutulong ang mga residente sa mga bumbero na apulahin ang sunog.

Pero hindi pinalad na mailigtas 50-anyos na ina, at ang walong-taong-gulang niyang bunsong anak na babae. Nagtamo naman ng mga paso sa katawan ang padre de pamilya at isa pa nilang anak, na dinala sa ospital.

Umabot sa unang alarma ang sunog, at idineklarang fire out pagkaraan ng mahigit isang oras.

Ayon sa awtoridad, gawa sa light materials ang bahay ng mga biktima at mabilis na kumalat ang apoy kaya hindi na sila nakalabas ng bahay.

Umabot umano sa limang bahay ang naapektuhan ng sunog, at inaalam pa ang pinagmulan ng sunog, at halaga ng pinsala. –FRJ GMA News