2 sakay ng motor, patay nang madaganan ng tumagilid na dump truck sa Negros Oriental; 9 sugatan

Dalawang sakay ng motorsiklo ang nasawi matapos silang madaganan ng tumagilid na dump truck sa Tanjay City, Negros Oriental. Siyam katao naman ang sugatan.

Sa ulat ni Vonne Aquino sa 24 Oras Weekend nitong Sabado, sinabing naganap ang insidente sa Barangay Santa Cruz Nuevo Biyernes ng hapon.

Dead on the spot ang 25-anyos na rider, pati ang 73-anyos na babaeng pasahero niya sa habal-habal.

Sinabi ng pulisya na magkasunod sa kalsada ang malaking dump truck at mini dump truck bago ang insidente.

Gayunman, nawalan umano ng preno ang malaking dump truck pagdating sa pababa at palikong kalsada, at mabangga nito ang mini dump truck hanggang dumiretso ito sa bangin.

“Napabilis ang takbo ng mini dump truck papunta sa isang bangin. Ang malaking dump truck namang nakabangga, sinubukang kumabig papuntang kaliwa...natumba ito sa parating na motorsiklo,” sabi ni Police Chief Master Sergeant Roquito Mirata, Investigator ng Tanjay CPS.

Nagtamo naman ng sugat ang dalawang driver ng mga truck, pati ang isang empleyado ng LGU at ang anim na gurong sakay ng mga truck.

Lumabas sa imbestigasyon na parehong pag-aari ng Tanjay LGU ang dalawang dump truck na naging service na ng mga tauhan ng LGU.

Nakisakay na rin ang mga gurong na aksidente. Dalawa sa kanila ang nagtamo ng fracture kaya kailangan manatili sa ospital.

Nasa kustodiya na ng pulisya ang dalawang truck driver na parehong tumangging magbigay ng kanilang panig.

Inaalam pa ng pulisya kung aakuin ng LGU ang pagpapagamot sa mga sugatan at gastusin sa mga nasawi.

Sinusubukan pa ng GMA News na makuha ang pahayag ang Tanjay LGU. —Jamil Santos/VBL GMA News