Lalaki, nakitang patay sa mabatong bahagi ng Dolomite Beach

Natagpuang patay ang isang lalaki sa mabatong bahagi ng Dolomite Beach sa Maynila.

Sa ulat ni Gabriel Gonzales sa Unang Balita nitong Huwebes, sinabing natagpuan ng mga awtoridad ang katawan ng wala nang buhay na lalaki umaga nitong Lunes.

Nakasuot ang biktima ng pulang t-shirt at pantalon.

Sinabi ng barangay na unang nakita ng security guard ng Dolomite Beach ang katawan, at agad niya itong ipinaalam sa mga awtoridad.

“Pinaalam po ng isang security dito sa barangay may lumutang na bangkay. Kaya agad naman pong ni-report din po ng tanod namin sa barangay chairman. Kaya pinuntahan po namin,” sabi ni Kagawad Erwin Bayan ng Barangay 668 sa Ermita, Maynila.

Tumugon ang mga tauhan ng Manila Police District para iproseso ang bangkay.

Batay sa inisyal na impormasyon ng mga awtoridad, dayo ang 40-anyos na lalaki na napag-alamang galing sa Surigao del Sur.

Bago nito, nakita pa ang lalaki na palakad-lakad malapit sa mga bato sa Dolomite Beach.

“Kahapon po naglalakad pa po iyon. Pinagbawalan siyang pumunta sa mga batuhan. Bawal pong gumawi po roon. Hanggang sa nilalapitan po para pagbawalan, lumayo. Lumapit sa mga batuhan saka tumalon noong lapitan na siya ng Philippine Coast Guard,” sabi ni Bayan.

Patuloy ang pag-iimbestiga ng Manila Police District.

Dinala ang bangkay sa punerarya, samantalang hinihintay ang mga kaanak ng lalaki. —Jamil Santos/AOLGMA News