2 lalaking dumayo sa QC para manghablot ng cellphone, arestado

Arestado ang dalawang lalaki na sakay ng motorsiklo matapos manghablot ng cellphone sa Barangay Don Manuel, Quezon City.

Nakuhanan sa CCTV ang pagdaan nila sa lugar.

Matapos ang krimen, makikita ang 18-anyos na biktimang college student na patawid ng kalsada.

“Pasakay na siya ng jeep kasi uuwi na siya tapos parang ginagamit niya 'yung cellphone niya at biglang may galing sa likod na riding-in-tandem saka hinablot,” ani Police Lieutenant Colonel Morgan Aguilar, ang Galas Police Station commander.

Nagkaroon pa aniya ng habulan hanggang sa ma-corner ng mga pulis ang mga suspek sa area ng Barangay Tatalon.

Ang isang suspek ay ang 28-anyos na lalaking nagmaneho ng motorsiklo habang ang isa naman ay ang 18-anyos na lalaking nanghablot ng cellphone.

Nabawi ang cellphone ng biktima na nagkakahalaga ng mahigit sa P10,000.

May nakuha pang baril na kargado ng mga bala mula sa 28-anyos na suspek.

Sa imbestigasyon, napag-alamang dayo lang sa Quezon City ang mga suspek na residente ng San Juan at Maynila.

“May nag-recruit sa kanila na isang tao na tinuturuan sila kung paano mang-snatch and then kapag naibebenta nila ang isang cellphone, lalo na high-end, binibigyan sila P3,000 each cellphone,” dagdag ni Aguilar.

Ayon sa pulisya, ang mga suspek din ang nanghablot ng cellphone sa Sampaloc, Maynila kamakailan.

Nakumpirma ito nang makipag-coordinate sa kanila ang Manila Police District.

Aminado ang mga suspek sa krimen.

“Nagawa lang po namin 'yon kasi nangailangan lang po. Birthday ng anak ko, sir,” giit ng 28-anyos na suspek.

Sabi naman ng 18-anyos na suspek: “Nagawa ko po 'yon dahil sa anak ko dahil sa pangangailangan. Panggatas po.”

Wala namang pahayag ang 28-anyos na suspek kaugnay sa nakuhang baril.

Nasampahan na ang dalawang suspek ng reklamong theft.

May karagdagang reklamo ang isang suspek ng paglabag sa Comprehensive Firearms and Ammunition Regulation Act. —KG GMA News