Baril na walang bala, naipasok umano ng isang 13-anyos na estudyante sa loob ng isang paaralan sa Baguio City

Nakumpiska sa isang 13-anyos na estudyante ang isang kalibre .38 na baril na walang bala sa loob ng isang paaralan sa Baguio City.

Sa ulat ng GMA Regional TV One North Central Luzon nitong Lunes, sinabing dinala umano ng Grade 8 na estudyante ang baril na walang bala sa paaralan at ipinakita sa kaniyang mga kaklase.

Pinagpasa-pasahan umano ng mga estudyante ang baril hanggang sa isa sa mga ito ang nag-report sa pamunuan ng paaralan.

Sa kuha ng larawan na ipinakita sa video, may bahagi ng baril ang nakakalas na.

Sa imbestigasyon ng mga awtoridad, sinasabi umano ng estudyante na nakita niya ang baril sa bodega ng kanilang bahay. Pag-aari umano ng kaniyang namayapang lolo na dating miyembro ng para-military unit ang baril.

Nasa kustodiya ng pulisya ang baril at patuloy pa ang imbestigasyon.

Isinailalim sa phycological intervention ang menor de edad na mag-aaral.

Sinisikap pang makuhanan ng pahayag ang pamunuan ng paaralan at ang magulang ng estudyante, ayon sa ulat.—FRJ GMA News