Jonvic Remulla, sinabing 'natural ang sayad ng utak' ni VM Respicio matapos mag-negative sa drug test ang huli

Bagaman binati ni Interior Secretary Jonvic Remulla si Reina Mercedes, Isabela Vice Mayor Harold Respicio matapos na magnegatibo sa drug test, sinabi ng kalihim na lumalabas na “natural ang sayad ng utak” ng lokal na opisyal.

Nagpa-drug test si Respicio nitong Miyerkoles matapos sabihin ni Remulla na dapat ipa-drug test ang bise alkalde kasunod ng pakikipagtalo at pakikipagsigawan nito sa mga opisyal ng barangay sa Reina Mercedes sa isang pagpupulong.

"Congratulations," saad ni Remulla. "Now that it's confirmed that he's not on shabu, totoo na talaga na natural ang sayad ng utak niya."

Bago nito, sinabi ni Remulla na ipinauubaya na niya sa mga opisyal ng lalawigan ang pag-aksyon tungkol kay Respicio. Ngunit iminungkahi niyang sumailalim sa drug test ang bise alkalde dahil sa naging asal nito sa gitna ng mainitang insidente sa pagpupulong.

“But [Governor Rodolfo Albano is] handling him. I advise him to give him a drug test kasi mukhang adik yung asal niya eh," anang kalihim.

Ipinahayag din ni Remulla ang pagkadismaya sa naging asal ni Respicio. Sa ilalim ng batas, may supervisory role ang Department of the Interior and Local Government (DILG) sa mga lokal na pamahalaan.

"Meron bang normal na vice mayor na ganun? Parang wala sa sarili eh. Di ba? Parang hindi halal,” dagdag ng kalihim na dating gobernadora ng Cavite.

Sinabi ni Remulla na pinag-aaralan din ng DILG ang posibleng pagpapalabas ng show-cause order na mag-aatas kay Respicio na ipaliwanag ang kanyang mga ginawa.

Binigyang-pansin din ng kalihim ang posibleng insidente ng pag-abuso sa isang person in authority matapos sigawan umano ni Respicio ang isang pulis.

Sa isang panayam sa telepono ni GMA News reporter Jun Veneracion, sinabi ni Respicio na handa niyang tanggapin ang hamon ni Remulla na sumailalim siya sa drug test.

Hinamon naman ni Respicio ang kalihim ng DILG na sumailalim din sa drug test at puwede pa silang magsabay sa isang ospital, at gawin nang live.

“Secretary Jonvic, magpa-drug test tayo now. Live! Exclusive! Samahan mo ko sa St. Luke’s, now! Today! Tignan natin kung nagdru-drugs si Atty. Harold Respicio,” sabi ni Respicio sa isang social media video.

Nang lumabas na ang resulta ng drug test, tinawag ni Respicio ang atensyon ng kalihim, “Jonvic, i-refund mo ko. Ang mahal ng drug test.” —FRJ GMA News