Ginang na humiling na magkaroon na ng apo sa 2 niyang anak na dalaga, nagkaroon bagong anak na lalaki

Sa edad na 45, pabirong hinihiling ng isang ginang sa kaniyang dalawang anak na dalaga na magnobyo na para magkaroon na siya ng apo. Pero ang hindi niya inasahan, isa pang anak na baby boy ang darating pala sa kaniya.

Sa ulat ni Katrina Son sa “24 Oras Weekend” nitong Linggo, sinabi ni Heidi Espiritu-Dimacali, na madalas niyang biruin ang dalawa niyang anak na babae na pumasok na sa relasyon para magkaroon na siya ng apo.

Bente-sais anyos na ang panganay niyang anak at isang aeronautical engineer, habang ang 22-anyos na isa pa, nag-aaral naman ng dentistry.

"Kaya nung nakita nila na mayroon nang ultrasound, ayun, doon na sila shocked," sabi ni Heidi na mahigit dalawang dekada ang agwat ng dalawa sa kanilang bunso.

Itinuring na high-risk ang pagbubuntis ni Heidi dahil sa kaniyang edad. Pagsapit niya ng ika-34 na linggo ng pagbubuntis, nakaramdam siya ng pananakit ng tiyan at inakala niyang manganganak na siya.

Nakaranas din siya ng premature labor na nauwi sa matinding sepsis. Sa kabila ng lahat, nailigtas ang sanggol at nailuwan niya matapos umabot sa 38 linggo ang kaniyang pagbubuntis.

Ayon kay Heidi, hindi na naging problema sa kaniyang mga anak ang mahigit dalawang dekadang agwat ng edad nila sa kanilang bago at bunsong kapatid dahil nag-uunahan pa ngayon ang mga ito sa pag-aalaga.

"Mas masaya ngayon kasi na-e-enjoy nila yung kapatid nila at excited silang laging umuwi, lalo na kapag hindi sila makuwi,” aniya. “Nag-aagawan sila kung sino ang unang kakarga at kung sino ang unang mag-aalaga.” —Nika Roque/FRJ GMA News