PISTON, may transport strike vs. Donald Trump sa Nov. 16

Magsasagawa ng kilos-protesta ang transport group na PISTON sa pagsisimula ng Association of Southeast Asian Nations (ASEAN) 2026 Summit sa Metro Manila sa November 16, 2026, na dadaluhan ni US President Donald Trump.

Sa ulat ni Mao dela Cruz sa Super Radyo dzBB nitong Martes, sinabi ni PISTON President Mody Floranda, na babatiin ng kanilang grupo ng protesta si Trump.

Bahagi ito ng serye ng mga aktibidad na naglalayong kondenahin ang pangulo ng Amerika na si Trump, na binatikos dahil umano sa pagpapataas ng tensyon sa Middle East na nagresulta sa pagsirit ng presyo ng langis sa buong mundo.

Ayon kay Floranda, sa oras na dumating si Trump sa Pilipinas, gagamitin nila ang mga jeepney upang iprotesta ang pagbisita nito sa bansa.

Ang transport strike sa Nobyembre 16 ang magsisilbing simula ng serye ng mga protesta ng PISTON, na magpapatuloy hanggang sa pag-alis ni Trump sa bansa.

Ilang pang grupo ng mga aktibista at estudyante ang nagpahayag din ng planong magsagawa ng mga protesta laban sa pagbisita ni Trump sa Pilipinas.

Inanunsiyo naman ng mga estudyante ng University of the Philippines Manila na magsasagawa sila ng malawakang walkout sa buong campus sa Biyernes bilang protesta laban kay Trump, ayon sa ulat ng publikasyon ng kanilang unibersidad na The Manila Collegian.

Nakatakdang idaos ang ASEAN Summit sa Pasay City mula Nobyembre 16 hanggang 18. Idineklara na rin ng Malacañang na holiday ang nasabing mga araw. Ilang kalsada na rin ang isinara para bigyang-daan ang mga delegado. — FRJ GMA News