Christa Pike na nakaligtas lethal injection, nagkamalay at nakakapagsalita na, ayon sa mga abogado

Nagkamalay at nakakapagsalita na si Christa Pike, ang bilanggo na nakaligtas sa bitay sa pamamagitan ng lethal injection sa Tennessee, USA noong nakaraang linggo, ayon sa kaniyang mga abogado nitong Martes.

Sa kabila ng matinding pinsala sa kaniyang mga braso, nakaposas sa kama si Pike, 50-anyos, na patuloy umanong tumatanggap ng critical medical care, ayon sa pahayag ng kaniyang mga public defense attorney.

Hinatulan ng kamatayan si Pike dahil sa kaniyang papel sa pagpapahirap at pagpatay sa isang kaklase tatlong dekada na ang nakalilipas.

Nakaligtas siya sa palpak na pagsasagawa ng lethal injection noong gabi ng Setyembre 30 sa Riverbend Maximum Security Institution sa Nashville, kabisera ng Tennessee. Mula noon ay nananatili siya sa ospital.

Bago ang araw ng pagbitay, nanawagan ang mga abogado ni Pike sa gobernador ng Tennessee na ibaba na lang sa habambuhay na pagkabilanggo ang parusa sa halip na bitay.

Giit ng abogado ni Pike, hindi nabigyan ng sapat na konsiderasyon sa parusa ang sarili nitong mga pinagdaanang trauma noong bata pa siya, kabilang ang sexual abuse, pagpapabaya, at hindi nagamot na sakit sa pag-iisip.

Labing-walong-taong gulang lang noon si Pike nang gawin ang karumal-dumal na krimen kasama ang nobyo.

Gayunman, natuloy pa rin ang pagbitay kay Pike pero pumalpak kahit dalawang dose ng kemikal na itinurok sa kaniya.

Mula sa pagiging unang babaeng sinubukang bitayin ng Tennessee sa loob ng mahigit 200 taon, si Pike ngayon ang unang taong naitalang nakaligtas sa Estados Unidos matapos mabigyan ng mga gamot para sa execution. – ulat mula sa Reuters/FRJ GMA News