Ilang nagpo-protesta, nagtipon-tipon sa labas ng ICC; ikatlong status conference sa kaso vs ex-Pres. Duterte, isinagawa

Sa ikatlong status conference ng International Criminal Court (ICC) Trial Chamber bago ang pagpapatuloy ng pagdinig sa kaso ni dating Pangulong Rodrigo Duterte, nagsagawa ng kilos-protesta ang ilang grupo ng mga Pilipinong manggagawa at naninirahan sa Netherlands nitong Miyerkoles (oras sa Pilipinas).

Panawagan nila sa mga Dutch at maging sa ICC, ituloy ang pagdetine kay Duterte. Anila, naging inspirasyon sa buong mundo ang paglilitis sa dating pangulo na itinuring umano ang sarili bilang "untouchable".

Ang ibang grupo naman, ginamit ang pagkakataon para ipanawagan ang pag-convict kay Vice President Sara Duterte, na anak ni Rodrigo, na nililitis ng Senate impeachment court sa Pilipinas.

Inihayag naman ng mga tagasuporta ng dating pangulo, na iilan lang ang nakapunta sa tapat ng ICC ngayong araw ng status conference.

Ayon sa isa sa kanila, wala silang nakaplanong aktibidad ngayong araw, pero nakapasok siya at ilan pang kasama sa loob ng ICC para panoorin ang pagdinig.

Kalahating oras bago ang itinakdang oras ng pagsisimula ng ICC Trial Chamber para sa status conference, wala pa ring impormasyon kung haharap sa pagdinig ang nakatatandang Duterte.

Hindi pa isinasapubliko ng ICC Registry ang anumang dokumento patungkol sa maaaring waiver ng depensa, gayundin ang oposisyon dito ng prosekusyon at abogado ng mga drug war victim.

Pero nang idaos na ang pagdinig, nakitang dumalo si Duterte, at muling nasilayan ng publiko matapos ang mahigit isang taon matapos siyang madetine sa ICC.