Batang bibili ng pandesal, natusok ng bakal sa tagiliran matapos mahulog sa kanal

Isang 10-taong-gulang na lalaki na bibili lamang ng pandesal ang natusok ng bakal sa tagiliran matapos siyang mahulog sa kanal sa Santa Rosa, Nueva Ecija.

Sa ulat ng Unang Balita nitong Biyernes, lumabas sa imbestigasyon ng pulisya na nahulog sa kanal sa gilid ng Maharlika Highway ang bata.

Sinamahan ng isang pulis ang bata sa kanal para hindi siya mag-panic habang hinihintay ang rescuers.

Gumamit ang rescuers ng grinder at inabot ng halos isang oras bago tuluyang naputol ang bakal na nakatusok sa tagiliran ng bata.

Dinala sa ospital ang bata, na ligtas na ngayon at patuloy na nagpapagaling. —Jamil Santos/AOL GMA News