Reklamong katiwalian, isinampa vs Villars kaugnay sa PrimeWater; reklamo, handa naming sagutin--Manny Villar

Nahaharap sa dalawang bilang ng reklamong katiwalian ang mga Villar, gayundin ang sa iba pang opisyal ng mga local water district dahil sa hindi umano maayos na serbisyo ng PrimeWater Infrastructure Corporation, na pag-aari ng pamilya Villar. Inihayag naman ng padre de pamilya na si Manny Villar, na handa nilang sagutin ang reklamo sa tamang lugar at tamang panahon.

Ayon kay Assistant Ombudsman Mico Clavano nitong Biyernes, ang mga inireklamo ay ang magkakapatid sina Senador Mark at Camille Villar, at si Paolo, pati ang kanilang mga magulang na sina Manny at Cynthia.

Sinabi ni Clavano, na natapos na ng mga imbestigador ng Ombudsman ang humigit-kumulang anim na buwang pagsisiyasat sa joint venture agreement ng PrimeWater sa iba't ibang water district na sumasaklaw mula 2015 hanggang 2022.

Inihayag niya na ang mga Villars ang beneficial owner ng Primewater.

Noong nakaraang Disyembre, iniulat na ibebenta ng Villar Group ang PrimeWater sa Crystal Bridges Holding Corp. ni Lucio Co.

At nitong nakaraang Hulyo, sinabi ni Co, na maglalaan ng Crystal Bridges ng P6.7 bilyon para sa rehabilitation and expansion ng Primewater.

Handang sagutin

Sa isang pahayag, sinabi ni Manny Villar, na wala pa silang natatanggap na kopya ng reklamo mula sa Ombudsman.

“We have learned through media reports of the complaints reportedly filed before the Office of the Ombudsman. As of this time, we have yet to receive copies of the complaints and therefore cannot meaningfully comment on their specific allegations,” saad ng dating Senate President.

Sinabi niya na iginagalang nila ang legal na proseso at sasagutin ang reklamo sa tamang panahon at tamang lugar.

“We are confident that, once given the opportunity to examine the allegations and the evidence supporting them, we will be able to fully and properly defend our rights and address the matters raised against us,” ayon kay Manny.

“In the meantime, we ask that the legal process be allowed to take its course and that conclusions not be drawn before the parties have been afforded the opportunity to be heard,” pagtatapos niya sa pahayag. –FRJ GMA News