Babae, sugatan matapos tambangan ng 2 lalaking nakamotorsiklo sa Makati

Sugatan ang isang babae matapos tambangan ng dalawang hindi pa nakikilalang nakamotorsiklong lalaki ang kaniyang sasakyan sa Chino Roces Avenue sa Makati City nitong Huwebes ng umaga, ayon sa pulisya.

Batay sa ulat ng pulisya, naganap ang insidente bandang 6:50 ng umaga sa harap ng isang bangko sa tabi ng isang condominium sa Barangay Pio Del Pilar.

Sinabi ng pulisya na nagmamaneho noon ng SUV ang biktima nang lapitan siya ng dalawang hindi matukoy na lalaki sakay ng isang pulang motorsiklo, at pinaputukan ang kaniyang sasakyan.

Tinamaan ang biktima sa binti at hita, habang tumakas naman ang mga suspek, na nakasuot ng motorcycle taxi service uniform.

Rumesponde ang mga pulis mula sa Sub-Station 3 ng Makati City Police Station, at isinugod sa ospital ang biktima.

Inaalam ng pulisya ang mga posibleng motibo sa krimen at pagkakakilanlan sa mga salarin. -- Jamil Santos/FRJ GMA News