Bagyong 'Queenie,' nasa PAR na; mga lugar na makararanas ng pag-ulan, alamin

Pumasok na sa Philippine Area of Responsibility (PAR) ang Tropical Storm Queenie na inaasahang magdadala ng maulap na kalangitan, kalat-kalat na pag-ulan, pagkulog at pagkidlat sa ilang lugar sa bansa.

Ayon sa state weather bureau na PAGASA nitong Huwebes, partikular na maaapektuhan ng pag-ulan na dala ng bagyo sa Sabado ang Batanes at Babuyan Islands

Sa ulat naman ng GTV News Balitanghali, sinabing hindi tatama sa kalupaan ang bagyo, at hindi rin hahatak sa Habagat.

Pero nagpapaulan na ang buntot nito sa bahagi ng Bicol Region, Eastern Visayas, Dinagat, Surigao del Norte, at Surigao del Sur.

Sa 11 a.m. advisory, sinabi ng PAGASA na si Queenie (international name: Surigae) ay nasa layong 1,310 kilometro silangan ng Northern Luzon nitong 10 ng umaga. Taglay nito ang pinakamalakas na hangin na 75 kilometro kada oras (kph) malapit sa gitna, at pagbugsong umaabot sa 90 kph.

Kumikilos ito pakanluran-hilagang-kanluran sa bilis na 35 kph.

Sa kasalukuyan, walang Tropical Cyclone Wind Signal na nakataas sa anumang bahagi ng bansa.

Ayon sa PAGASA, maaaring magdala ang gilid at buntot ng bagyo ng malalakas hanggang katamtaman na pagbugso ng hangin sa Batanes, Babuyan Islands at Ilocos Norte ngayong Huwebes.

Nagbabala rin ang ahensya sa bahagya hanggang katamtamang pag-alon ng dagat, na maaaring umabot sa isa hanggang dalawang metro ang taas sa mga baybaying-dagat ng Northern Luzon sa susunod na 24 oras.

Ayon pa sa PAGASA, inaasahang mananatili ang lakas ni Queenie hanggang Biyernes at unti-unti itong lalakas pa habang nasa loob ng PAR.

Posibleng umabot ito sa typhoon category pagsapit ng Linggo.

Hindi naman inaasahan na direktang makaaapekto sa lagay ng panahon sa bansa ang bagyo sa susunod na tatlong araw, ayon sa PAGASA. – FRJ GMA News