Lalaking nagnakaw ng cellphone sa gadget store, hinabol ng mga tao sa Pangasinan

Nahuli ang isang lalaking nagnakaw ng cellphone sa isang gadget store matapos siyang habulin ng mga tao sa Calasiao, Pangasinan.

Batay sa impormasyon mula sa GMA Regional TV, na iniulat sa Balitanghali nitong Huwebes, mapanonood ang pagtakbo ng ilang tao upang kabulin at mahuli ang umano’y magnanakaw.

Bago nito, nagpanggap ang suspek na bibili sa isang gadget store. Nagkunwaring magbabayad na ang suspek nang bigla nitong itinakbo palabas ng tindahan ang cellphone.

Humingi ng tulong ang tindera sa mga tao kaya hinabol nila ang suspek hanggang sa maabutan nila.

Pagdating sa estasyon ng pulisya, nabawi ang ninakaw na cellphone ng lalaki na nagkakahalaga ng halos P6,000.

Sinabi ng pulisya na dati nang nasangkot sa kaso na may kinalaman sa droga ang suspek.

Kasalukuyan nakakulong sa Calasiao Police Station at nahaharap sa reklamong theft ang suspek, na walang pahayag. – Jamil Santos/FRJ GMA News