Sunog sa Q.C. na ikinasawi ng 4 na magkakaanak, hinihinalang nagsimula sa charger ng e-bike

Nasawi ang apat na magkakamag-anak, kasama ang dalawang senior citizen, matapos masunog ang tinitirahan nilang townhouse sa Barangay Bahay Toro, Quezon City.

Sa ulat ni Gabriel Gonzales sa GMA News Unang Balita nitong Miyerkoles, sinabing nilamon ng naglalagablab na apoy ang townhouse bago mag-5 p.m nitong Martes.

Umabot lang ang sunog sa unang alarma matapos na basahin ng mga residente at bumbero ang mga katabing townhouse para hindi na kumalat ang apoy.

Bagaman nakontrol kaagad ang apoy, nagresulta pa rin ito ng pagkasawi ng apat na magkakaanak nang hindi na sila nakalabas sa kanilang nasusunog na bahay.

“Na-suffocate sila sa usok. Dito raw sila sa baba na nakuha sa ground floor. Gawa ng pumasok yata sila doon sa may... may parteng kusina sa may CR,” sabi ni Bernardo Asistorga, BPSO, Brgy. Bahay Toro, Quezon City.

Nakaligtas naman ang isa pa nilang kaanak matapos makalabas sa nasusunog na townhouse.

Lumabas sa paunang imbestigasyon na posibleng nanggaling ang apoy sa charger ng e-bike.

“Posibleng nangyari ‘yung sa e-bike, nagkaroon siya ng spark yata,” sabi ni Asistorga.

Dinala ang mga labi ng mga biktima sa punerarya, samantalang ginagamot pa sa East Avenue Medical Center ang nakaligtas.

Kinurdonan na ang nasunog na townhouse habang patuloy na inaalam ang sanhi ng sunog at halaga ng mga natupok na ari-arian. -- Jamil Santos/FRJ GMA News