2 rider, patay nang magkasalpukan ang minamaneho nilang mga motorsiklo sa Pangasinan

Nasawi ang dalawang rider, at sugatan ang isang angkas, nang magkabanggaan ang minamaneho nilang mga motorsiklo sa Urdaneta City, Pangasinan. Ang isang biktima, sa Quezon City pa galing.

Sa ulat ni CJ Torida sa GMA Regional TV One North Central Luzon nitong Martes, sinabing nangyari ang insidente sa bahagi ng Manila-North Road sa Barangay Nancayasan noong Linggo ng madaling araw.

Base sa imbestigasyon ng pulisya, galing sa Quezon City ang isang biktima at papunta sa kaniyang tiyahain sa Pangasinan, habang pauwi naman sa Nueva Ecija ang isa pang rider na mayroong angkas.

Ayon kay Police Lt. Roselle Marinas, PIO, Urdaneta City Police Station, sinabi ng nakaligtas na angkas na sinakop umano ng nakabanggaan nilang rider ang linya ng kanilang daan kaya nangyari ang salpukan.

Hindi na umabot nang buhay sa ospital ang dalawang rider, habang patuloy na nagpapagaling ang angkas.

Sinisikap pang makuhanan ng pahayag ang kaanak ng mga nasawing rider, ayon sa ulat.

Samantala, nasawi naman ang isang driver ng kolong-kolong nang aksidente niyang mabangga ang nakaparadang tricycle sa bahagi ng Bypass Road sa Urdaneta pa rin.

Nawalan umano ng kontrol ang driver sa kaniyang sasakyan, nalaglag at tumama ang ulo sa sementadong kalsada.

Hindi na umabot nang buhay sa ospital ang biktima. – FRJ GMA News