Senate court, pinayagan ang prosekusyon na iatras ang 3 articles of impeachment vs Sara Duterte

Tinanggap ng Senate impeachment court nitong Martes ang hakbang ng House prosecution panel na iatras ang tatlo sa apat na Articles of Impeachment na isinampa laban kay Vice President Sara Duterte.

Ginawa ni Senate impeachment court presiding officer Francis Escudero ang desisyon matapos sabihin ng prosekusyon sa korte ng Senado na hindi na nito itutuloy ang tatlong Articles of Impeachment at pananatilihin lamang ang isa: Artikulo 2 tungkol sa pag-iipon ng hindi maipaliwanag na kayamanan dahil sa hindi pagsisiwalat ng mga ari-arian sa Statement of Assets, Liabilities and Net Worth (SALN) at hindi pag-divest ng mga interes sa negosyo sa kabila ng pagbabawal ng Konstitusyon.

“The court accepts and confirms the prosecution’s manifestation,” sabi ni Escudero.

Nagpasiya ang prosekusyon na alisin ang Artikulo I sa confidential funds, Artikulo III sa panunuhol, at Artikulo IV sa planong pagpatay, mga matinding banta, at pag-uudyok sa sedisyon laban sa Pangulo matapos ang isang linggong testimonya mula sa Anti-Money Laundering Council, mga opisyal ng bangko at kompanya ng seguro, pati na rin sa abogado at accountant na si Alexander Cabrera, na inaakusahan ang Bise Presidente at ang kaniyang asawa ng pag-iipon ng hindi maipaliwanag na kayamanan na nagkakahalaga ng hindi bababa sa P817 milyon at pinakamataas sa P1.5 bilyon.

Sinabi ni Escudero na dapat pahintulutan ng impeachment court ang alternatibong paglalahad ng ebidensiya sa pagitan ng prosekusyon at ng depensa para maiwasan ang isang sitwasyon kung saan hindi mapabubulaanan ng depensa ang mga paratang kung saan iniharap ang ebidensya ngunit biglang binawi. — VBL GMA News