DILG Remulla: Asylum request ni Harry Roque sa ibang bansa, ibinasura; fake news 'yan, giit naman ng dating opisyal

Ibinasura na umano ang kahilingan para sa asylum sa ibang bansa ni Harry Roque, ayon kay Interior and Local Government Secretary Jonvic Remulla nitong Martes. Mariin naman itong itinanggi ng dating presidential spokesperson.

“By the way, tapos na 'yung asylum, na-deny 'yung asylum ni Harry Roque. Tapos na 'yung five months. Kung may red notice na, kukunin ko siya,” sabi ni Remulla sa isang press briefing.

Sa naturang briefing, hindi tinukoy ni Remulla kung anong bansa ang nagbasura sa hirit na asylum ni Roque. Nang tanungin tungkol sa detalye, sinabi ng kalihim na kukumpirmahin niya muna ito.

Gayunman, sinabi niyang tatapusin muna niya ang pagberipika sa mga detalye ng proseso dahil hindi siya ang humahawak sa kaso.

Ngunit pagtiyak niya, ibabalik niya si Roque sa Pilipinas kapag may red notice na laban sa dating opisyal.

Samantala sa isang pahayag, itinanggi ni Roque ang sinabi ni Remulla na ibinasura ang kaniyang aplikasyon na manirahan sa ibang bansa.

Nauna nang iniulat na nasa Austria si Roque.

“For the nth time, Secretary Jonvic Remulla has publicly claimed that my application for asylum in Austria has been denied. This is fake news. Secretary Remulla claims that my asylum application should be considered denied because it was supposedly not acted upon within six months,” saad ni Roque sa Facebook post.

“Until the Austrian authorities themselves issue a decision on my application, claims that my asylum bid has already been denied are false and misleading,” pahayag pa ng dating opisyal.

Noong Nobyembre 2025, kinumpirma ni Roque na nag-apply siya para sa asylum sa Netherlands noong Marso. Iniulat na ipinasa ang kaniyang petisyon sa Austria dahil ang naturang bansa ang nagbigay sa kaniya ng visa.

Nahaharap si Roque sa mga kasong qualified human trafficking kaugnay ng Philippine Offshore Gaming Operator (POGO) na Lucky South 99.

Nauna nang sinabi ng Presidential Anti-Organized Crime Commission (PAOCC) na hiniling ng gobyerno ng Pilipinas sa International Criminal Police Organization (Interpol) na maglabas ng red notice laban kay Roque. —FRJ GMA News